'General registration of voters, simula Aug. 1 na'

Simula sa unang araw ng Agusto, sisimulan na uli ng Commission on Elections (Comelec) ang general registration of voters sa buong bansa.

Ayon kay Comelec chairman Sixto Brillantes, ngayong tapos na umano ang kanilang trabaho sa Autonomous Region in Muslim Mindanao ay maari na nilang umpisahan uli ang pagtanggap ng mga registrants sa buong bansa.

Sinabi pa ni Brillantes na magtatapos ang nationwide general registration sa October 31.

Target naman aniya ng poll body na makapagpalabas ng final list of voters para sa ARMM bago ang pagsisimula ng paghahain ng mga certificates of candidacy.

Samantala, hindi na umano magagamit sa 2013 elections ang may 1,000 mga Precinct Count Optical Scan (PCOS) machines na binili ng Commission on Elections (Comelec).

Ayon kay Comelec Chairman Sixto Brillantes, sa mahigit 82,000 units ng nasabing mga makina, nasa 50,000 na umano ang kanilang sinuri at nakapasa sa hardware acceptance testing, habang ang may 30,000 ay sinusubukang ayusin dahil sa ilang mga depekto.

Una ng naglaan ang Comelec ng P1.8 million na pondo para sa pagbili ng nasabing mga makina na unang ginamit noong 2010 presidential elections.