Kaso ng pagdukot sa Pinoy worker sa Kenya, tinututukan na - DFA

Nakikipag-ugnayan na ang Philippine embassy sa Nairobi sa Kenyan government hinggil sa ginagawang hakbang kaugnay sa pagkakadukot ng isang Pinoy worker sa rehiyon.

Ayon kay Department of Foreign Affairs spokesman Raul Hernandez, maliban sa mga local authorities, nakikipag-ugnayan din ang embahada sa Norwegian Refugee Council at iba pang foreign embassies na kasama ang kanilang kababayan sa mga dinukot.

Una rito, naiulat ang pagkakadukot sa nasabing Filipino aid worker na kinilalang si Glenn Costes at tatlong kasamang dayuhan sa bahagi ng Ifo2 West Dadaab refugee camp.

Sinasabing sinalakay ng armadong grupo ang refugee camp kung saan isa ang napatay at dalawa ang nasugatan.

Kaagad namang naglunsad ng rescue operations ang Kenyan security forces sa border regions ng Somalia, kung saan pinaniniwalaang dinala ang tatlo.

"The search is intensifying and more security forces have been sent to make every effort possible but, so far, no one has been recovered," ani Kenyan army spokesman Cyrus Oguna sa isang panayam.

Nag-deploy na rin umano ng aerial search ang militar.

"The information we have is that the attackers came from the camp, and it raises serious questions that if they were refugees, how they got into the camp armed," dagdag naman ni Kenyan Defence Minister Yusuf Haji.